प्रत्युत्तर

॥ सानु घिमिरे ॥

मजेत्रोमा बाँधेर तिम्रो सम्मान 

बडो सानसँग हिंडेकी थिएँ,

तिम्रो उपहार, धारे हातको रिबन

हेर त कति सुहाएन मेरो शिरमा ।

आक्रोश, दुर्वचन र आरोपहरुमा

कस्तरी जिल्लिएको हाम्रो दौंतरी ?

चौबन्दीमा अड्किन खोजिरह्यौ

मुटुभन्दा पर तिम्रो स्थान,

कति खसखसाउने तिम्रो घाँटी

कति चुकचुकाउने तिम्रो जिब्रो 

पटुकीभरि छन् सम्झनाका मकैहरू

गोठालो जाँदा फक्याउने गर्छु ।

प्रत्युत्तर फेरि पनि त्यही हो,

तिमी चम्काइराख निष्ठुरताको पाइन

म सम्झिउँला त्यो हार्दिकताको मूल्य ।

डढेलो लागेको वनमा एक दिन

तिमीले खोज्नु स्नेहको ऐंसेलु,

बुटामुनिबाट कतै पलाउनेछ अर्को मुना ।

- सुनसरी, हाल: सिड्नी, अस्ट्रेलिया ।

Posted in: कविता