कविता

अन्तिम भ्यालेन्टाइन

* रमेश सफर निरौला

यसपालिको भ्यालेन्टाइन
नधुम्मिएरै बित्यो

सायद
तिम्रो र मेरो सम्बन्धमा पनि
आगामी वसन्तमा
झ्याम्म पालुवा लाग्ला कि,
ढकमक्क फूल फुल्ला कि !

लक्षण हेरेर भविष्यको कल्पना गर्ने
म र मजस्ता
आशातीत भविष्य खोज्नेको जीवनमा
एकथुँगा कतै लागेमा
त्यो तिमीमा समर्पित हुनेछ ।

उता बर्खा लागेपछि पनि
हाम्रो सम्बन्ध नरुझोस्
थर्कमान आकाशसँग
हाम्रो सम्बन्ध नजुझोस् ।
त्यसै समय,
म बर्खे समाहा भएर झर्नेछु
तिम्रा गह्राहरूमा
के तिमी मलाई थुन्न सक्छौ
आफ्ना मजबुत आलीहरूले ?

- कुभिण्डे, खोटाङ
हाल - त्रि.वि.कीर्तिपुर ।

Posted in: कविता